வேத ஜோதிடத்தில் கிரகங்களின் சேர்க்கையால் உருவாகும் யோகங்கள் மனித வாழ்க்கையில் குறிப்பிடத்தக்க தாக்கத்தை ஏற்படுத்தும். குறிப்பாக, ஒரு ராசியில் இரண்டு கிரகங்கள் இணைந்து யோகம் உருவாகும்போது, அதன் தாக்கம் அனைத்து ராசிகளிலும் காணப்படும்.

அந்த வகையில், அக்டோபர் மாதத்தில் கிரகங்களின் ராஜாவாகக் கருதப்படும் சூரியனும், அசுரர்களின் குருவான சுக்கிரனும் இணைந்து பயணிக்கவுள்ளனர். இதன் மூலம் சுக்ராதித்ய ராஜயோகம் உருவாகிறது.

அதுவும் சுக்கிரனின் சொந்த ராசியான துலாமில் இந்த யோகம் உருவாகவுள்ளதால், சில ராசிக்காரர்களுக்கு  நிதி மற்றும் தொழில் நிலையில் பெருமளவில் சாதக பலன்கள் கிடைக்கும் என்று  எதிர்ப்பார்க்கப்படுகின்றது.

வேத நாட்காட்டியின்படி, சூரியன் அக்டோபர் 17ஆம் தேதி சுக்கிரனின் சொந்த ராசியான துலாமில் நுழைகிறார். அப்போது அழகு, ஆடம்பரம், காதல், செல்வம் மற்றும் செழிப்பின் காரணியாகக் கருதப்படும் சுக்கிரனும் அங்கு இருப்பதால், இரு கிரகங்களின் சேர்க்கை ஏற்படுகிறது.

இந்த யோகத்தின் தாக்கம் 12 ராசிகளிலும் காணப்பட்டாலும், குறிப்பாக இந்த 4 ராசிக்காரர்கள் தொழில், பணம் மற்றும் வியாபாரம் தொடர்பான விஷயங்களில் சாதகமான பலன்களைப் பெறப்போகின்றார்கள். அந்த அதிர்ஷ்ட ராசிகள் யார் யார் என இந்த பதிவில் பார்க்கலாம்.

மேஷம்

மேஷ ராசியின் 7-வது வீட்டில் சூரியன் மற்றும் சுக்கிரன் சேர்க்கையால் சுக்ராதித்ய ராஜயோகம் உருவாகிறது. இதனால் தொழில் மற்றும் நிதி விஷயங்களில் சாதகமான மாற்றங்கள் ஏற்படும்.

கடின உழைப்புக்கான பலன் கிடைக்கும். பணிபுரிபவர்களுக்கு புதிய பொறுப்புகள் அல்லது பதவி உயர்வு கிடைக்கலாம். வேலை தேடுபவர்களுக்கு நல்ல வாய்ப்புகள் அமையும்.

புதிய வருமான ஆதாரங்கள் உருவாகும். நிலுவையில் இருந்த பணிகள் வெற்றிகரமாக முடியும். கூட்டு தொழில் செய்பவர்களுக்கு நல்ல லாபம் கிடைக்கலாம். இருப்பினும், பெரிய நிதி முடிவுகளை எடுக்கும்போது நன்கு சிந்திப்பது நல்லது.

கடகம்

கடக ராசியின் 4-வது வீட்டில் சூரியன் மற்றும் சுக்கிரன் சேர்க்கையால் சுக்ராதித்ய ராஜயோகம் உருவாகிறது. இதனால் குடும்ப வாழ்க்கை மகிழ்ச்சியாக இருக்கும்.

புதிய வீடு வாங்கும் ஆசை நிறைவேறலாம். பணியில் இருப்பவர்களுக்கு கடின உழைப்புக்கான நல்ல பலன் கிடைக்கும். சக ஊழியர்கள் மற்றும் உயர் அதிகாரிகளின் ஆதரவு கிடைக்கும்.

தொழிலதிபர்களுக்கும் இந்த காலம் சாதகமாக இருக்கும். வருமானம் அதிகரிக்கும் வாய்ப்புள்ளது. பணிகளை திட்டமிட்டு செய்து முடித்தால் எதிர்பாராத நல்ல பலன்கள் கிடைக்கலாம்.

கன்னி

கன்னி ராசியின் 2-வது வீட்டில் சூரியன் மற்றும் சுக்கிரன் சேர்க்கையால் சுக்ராதித்ய ராஜயோகம் உருவாகிறது. இதனால் நிதி நிலை மேம்படும்.

வருமான ஆதாரங்கள் அதிகரிக்கலாம். நீண்ட நாட்களாக கிடைக்காமல் இருந்த பணம் கைக்கு வர வாய்ப்புள்ளது. முதலீடுகளில் நல்ல லாபம் கிடைக்கலாம்.

வியாபாரிகளுக்கும் சாதகமான பலன்கள் கிடைக்கும். பணியிடத்தில் பொறுப்புகள் அதிகரிப்பதுடன், உங்கள் செயல்திறனுக்கும் மதிப்பு கிடைக்கும். இருப்பினும், நிதி முடிவுகளை எடுக்கும் முன் முழுமையான தகவல்களை அறிந்து செயல்படுவது நல்லது. திட்டமிட்டு செயல்பட்டால் எதிர்பார்த்த வெற்றியைப் பெறலாம்.

துலாம்

துலாம் ராசியின் முதல் வீட்டில் சூரியன் மற்றும் சுக்கிரன் சேர்க்கையால் சுக்ராதித்ய ராஜயோகம் உருவாகிறது. இதனால் பணியிடத்தில் முன்னேற்றத்திற்கான வாய்ப்புகள் கிடைக்கும்.

சிலருக்கு புதிய பொறுப்புகள் அல்லது பதவி உயர்வு கிடைக்கலாம். வணிகர்களுக்கு புதிய தொடர்புகள் மூலம் லாபம் தரும் ஒப்பந்தங்கள் அமையலாம். பணிகளை வெற்றிகரமாக முடிப்பதால் மனநிம்மதி கிடைக்கும்.

தன்னம்பிக்கை அதிகரித்து, புதிய முயற்சிகளை மேற்கொள்ளும் உத்வேகம் ஏற்படும். பல்வேறு வழிகளில் இருந்து வருமானம் கிடைக்க வாய்ப்புள்ளதால், நிதி நிலையும் மேம்படும்.