தினமும் கணினி, லேப்டாப், ஸ்மார்ட்போன் எனப் பல சாதனங்களில் ஏராளமான வார்த்தைகளைத் தட்டச்சு செய்கிறோம். ஆனால், கீபோர்டில் உள்ள மற்ற பட்டன்களைவிட ஸ்பேஸ்பார் (Spacebar) மட்டும் ஏன் இவ்வளவு அகலமாக இருக்கிறது என்று எப்போதாவது யோசித்திருக்கிறீர்களா?

இதற்குப் பின்னால் பயனர்களின் வசதியையும் தட்டச்சு வேகத்தையும் கருத்தில் கொண்ட ஒரு முக்கியமான வடிவமைப்புக் காரணம் இருக்கிறது.இது குறித்த விரிவான விளக்கத்தை இந்த பதிவில் பார்க்கலாம்.

அடிக்கடி பயன்படுத்தப்படும் பட்டன்

தட்டச்சு செய்யும்போது ஒவ்வொரு சொல்லுக்கும் இடையில் இடைவெளி விடுவது அவசியம். இதனால், மற்ற பட்டன்களுடன் ஒப்பிடும்போது ஸ்பேஸ்பார் அதிக முறை பயன்படுத்தப்படுகிறது.

அதன் அளவு பெரிதாக இருப்பதால், கீபோர்டைப் பார்த்துக்கொண்டே இருக்காமல் தட்டச்சு செய்பவர்கள்கூட அதை எளிதாகக் கண்டறிந்து அழுத்த முடிகிறது. இது வேகமாகவும் தடையின்றியும் தட்டச்சு செய்ய உதவுகிறது.

இரு கட்டைவிரல்களாலும் அழுத்தலாம்! கீபோர்டின் கீழ்ப்பகுதியில் அமைந்துள்ள ஸ்பேஸ்பாரை இடது அல்லது வலது கட்டைவிரலைப் பயன்படுத்தி எளிதாக அழுத்தலாம்.

அதன் அகலமான வடிவமைப்பு காரணமாக, கைகளை அதிகமாக நகர்த்த வேண்டிய அவசியம் குறைகிறது. இதனால் நீண்ட நேரம் தட்டச்சு செய்யும்போதும் வசதியாகச் செயல்பட முடிகிறது.

டைப்ரைட்டர் காலத்திலேயே தொடங்கிய வடிவமைப்பு

ஸ்பேஸ்பாரின் பெரிய வடிவமைப்பு நவீன கணினிகளுடன் மட்டுமே தொடங்கியதல்ல.பழைய இயந்திர டைப்ரைட்டர்களிலும் சொற்களுக்கு இடையில் இடைவெளி விடுவதற்காக அகலமான பட்டன் பயன்படுத்தப்பட்டது.

பின்னர் கணினி கீபோர்டுகள் உருவானபோதும், பயனர்கள் ஏற்கெனவே பழகியிருந்த இந்த அமைப்பு தொடர்ந்து பயன்படுத்தப்பட்டது.

தட்டச்சுப் பிழைகளைக் குறைக்கவும் உதவுகிறது

ஸ்பேஸ்பார் சிறியதாக இருந்தால், வேகமாகத் தட்டச்சு செய்யும்போது அதைத் தவறவிடுவதற்கான வாய்ப்பு அதிகரிக்கலாம். இதனால் சொற்கள் ஒன்றோடொன்று ஒட்டியிருப்பது போன்ற பிழைகள் ஏற்படலாம்.அகலமான ஸ்பேஸ்பார் இத்தகைய தவறுகளைக் குறைத்து, தட்டச்சு செய்வதை எளிதாக்க உதவுகிறது.

வெறும் இடைவெளிக்கான பட்டன் மட்டுமல்ல..

கணினிகளில் ஸ்பேஸ்பார் பொதுவாக இடைவெளி விடுவதற்குப் பயன்பட்டாலும், சில மென்பொருட்கள் மற்றும் இணையதளங்களில் இது கூடுதல் செயல்பாடுகளையும் கொண்டுள்ளது.

உதாரணமாக, வீடியோவை இயக்குவது அல்லது இடைநிறுத்துவது போன்ற செயல்களுக்கு சில தளங்களில் ஸ்பேஸ்பாரைப் பயன்படுத்தலாம்.இருப்பினும், அதன் செயல்பாடு பயன்படுத்தப்படும் மென்பொருளைப் பொறுத்து மாறுபடும்.

ஆக, கீபோர்டில் ஸ்பேஸ்பார் மட்டும் பெரிதாக இருப்பது வெறும் வடிவமைப்பு அழகுக்காக அல்ல.அடிக்கடி பயன்படுத்தப்படும் ஒரு பட்டனை எளிதாகவும் வேகமாகவும் துல்லியமாகவும் அழுத்துவதற்கு உதவும் வகையில் அது வடிவமைக்கப்பட்டுள்ளது என்பது குறிப்பிடத்தக்கது.